#BirBax #xalqtəbabəti #balqabaq
#kabak #sağlamlıq #baki
Hər gün balqabaq tumu yesəniz, nə olar? Bu haqda heç düşünmüsüzmü?
Balqabaq tumunun faydaları təkcə xalq təbabəti deyil, həm də, tibb elmi tərəfindən təsdiqlənib. Ürək-damar problemlərindən tutmuş, mədə bağırsaqa qədər onlarla xəstəliyə çarə olan bu möcüzədən bəs necə istifadə edək? Gündəlik miqdarı nə qədərdir? Videomuza sona kimi baxsanız biləcəksiniz. Üstəlik, kimlərə ondan istifadə etmək olmaz haqda da məlumat verəcəm. Diqqətiniz məndə olsun.
Dostlar, rəydə balqabaq tumu barədə düşüncələrinizi yazmaqda sərbəstsiniz. Siz necə, balqabaq tumu yeyirsinizmi? İstifadə edib faydasını görən varmı? Zəhmət olmasa şərh bölümünə yazın. Mən də onun faydaları və zərərlərindən danışım.
Balqabaq tumu sinklə zəngindir. Sink bədənimizin fəaliyyətində böyük rol oynayan vacib mineraldır. İmmunitetimizi möhkəmləndirən sinkin faydalı olduğu orqanlarımızın, bioloji sistemlərin siyahısını yazsaq, çox uzanar. 30 qr balqabaq tumunda orqanizmin ehtiyacı olan gündəlik sink dozasının, təxminən, 70%-i var. Sink sümük sağlamlığının qoruyucusudur: sümüklərin sıxlığını bərpa edir, osteoporozun qarşısını almaqda mahirdir. Bundan əlavə, sink oynaq iltihabını azaldır, həzmi normallaşdırır, pis xolesterolu, yəni aşağı sıxlıqlı lipoproteinləri azaltmağa kömək edir. Əgər arıqlamağa çalışırsınızsa, sink orqanizmin ən yaxşı dəstəkçisi kimi çıxış edir. Kişi orqanizminin sağlamlığı və gücünü itirməməyi baxımından da sink əvəzsizdir. Gəncliyindən etibarən kişilərin hər gün, ən azı, 1 xörək qaşığı balqabaq tumu yeməsi faydalıdır;
Balqabaq tumu parazit əleyhinə vasitədir. “Uşağın qurdu var, balqabaq tumu yedirt” deyimini, çox güman, eşitməyən qalmayıb. Lakin unutmayın ki, diaqnozu həkim qoymalı, balqabaq tumunun dozasını həkim təyin etməlidir. Bununla belə, yaxşı olar ki, profilaktiki tədbir kimi, ən azı, həftədə 2-3 dəfə uşaqlarınıza balqabaq tumu yedirin. Balqabaq tumlarının, daha doğrusu, onları əhatə edən pərdənin tərkibində kukurbutin (cucurbutin) adlı amin turşusu var. Bu turşu insanlar üçün tamamilə təhlükəsizdir, ancaq qurdlara iflicedici təsir göstərir və onların bədəndən atılmasına kömək edir;
Balqabaq tumu kimyəvi elementlərlə zəngindir. Kalsium, kalium, fosfor, mis, dəmir, manqan kimi mikroelementlərin qaynağı olan balqabaq tumunu rasiona daxil etməkdə tərəddüd etməyin. Bu mikroelementlər hamısı birlikdə bədənimizin ümumi sağlamlığına, təravətli qalmasına kömək edir, dərinin, saçın və dırnaqların vəziyyətinin yaxşılaşmasına səbəb olur. Ayrıca, bilməlisiniz ki, balqabaq tumları çiy halda daha faydalıdır. Qovrulan zaman tumların faydalı xüsusiyyətlərinin əhəmiyyətli hissəsi itir;
Balqabaq tumları xərçəng əleyhinə vasitədir. Tumların, xüsusilə, qida borusu xərçənginə qarşı effektiv olmasını alimlər də təsdiqləyir. Mütəxəssislərin fikrincə, balqabaq tumlarının antixərçəng xüsusiyyəti tərkibindəki sink və kalsiumla bağlıdır. Sink xərçəng hüceyrələrindən gələn siqnallara reaksiya verir və onları zərərsizləşdirir;
Balqabaq tumları qusma və ürəkbulanma zamanı köməkçi vasitə kimi istifadə olunur. Bu da onların daha bir maraqlı xüsusiyyətidir;
Maqnezium qaynağı olan tumlar. Fakt budur ki, bir insan hər gün müəyyən miqdarda maqnezium qəbul edərsə, qəfil ürək dayanması, infarkt və ya insult kimi hadisələr daha az baş verər. 30 qr balqabaq tumu orqanizmin gündəlik maqnezium ehtiyacının 50%-ni ödəyir. Maqnezium geniş fəaliyyət spektrinə malikdir:
-sümüklərimizin və dişlərimizin sağlamlığına məsuldur;
-ürəyimiz də daxil olmaqla, əzələlərimizin işinə cavabdehdir;
-qan təzyiqini aşağı salır;
-fiziki dözümlülüyü artırır;
Ümumiyyətlə, maqnezium ən vacib minerallardandır. Yetkin bir insanın gündə, ən azı, 400 milliqram maqnezium qəbul etməsi lazımdır;
Balqabaq tumları lif mənbəyidir. Yetkin bir insan orqanizminin gündəlik lif ehtiyacı, təqribən, 30 qr-dır. İnsanların əksəriyyəti orqanizminin tələbatını ödəməkdə çətinlik çəkir. Lif bağırsaqlarımızın sağlamlığı üçün vacibdir. Əlavə lif mənbəyi kimi hər gün balqabaq toxumu yemək çox yaxşı seçimdir;
Balqabaq tumunun zərərləri və əks təsirləri
Balqabaq tumları sağlam qidadır, lakin müəyyən nüansları bilmək lazımdır. Onun bəzi əks təsirləri var:
Mədə xorası olanlar balqabaq tumlarından istifadə edərkən ehtiyatlı olmalıdırlar. Qoz-fındıq kimi, balqabaq tumu da həzm edilməsi çətin qidadır; mədənin həddindən artıq şirə ifraz etməsinə səbəb olur. Sağlam orqanizm üçün normal vəziyyətdir, lakin mədə xorasının ağırlaşmasına yol açır;
Balqabaq tumu yüksək kalorili məhsuldur: 100 qr tumda 560 kilokalori var. Arıqlamağa çalışırsınızsa, ümumi gündəlik kalori qəbulunuzda bunu nəzərə almalısınız;
Bəzi insanlarda balqabaq tumlarına qarşı allergik reaksiya ola bilər. Əgər fərdi dözümsüzlüyünüz varsa, qəbul etməməlisiniz. Bütün hallarda, çalışın ki sağlam olasız.